நினைத்ததை நிறைவேற்றும் ''குபேர முத்திரை''

 

குபேர முத்திரை

செல்வத்தின் அதிபதியாகக் கருதப்படுபவர் குபேரன். அவரது பெயரால் இந்த முத்திரை அழைக்கப்படுகிறது.

செய்முறை

மோதிரவிரல் சுண்டுவிரல் ஆகிய இரண்டு விரல்களையும் மடக்கி கட்டை விரலின் அடிப்பாகத்தைத் தொடும்படி வைத்துக் கொள்ளவேண்டும். பிறகு கட்டைவிரல், ஆட்காட்டி விரல், நடுவிரல் ஆகியவற்றின் முனைகள் தொட்டுக்கொண்டிருக்கும் படி வைக்கவேண்டும்.

பலன்கள்

நவக்ரஹங்களில் கட்டை விரல் செவ்வாயையும், ஆட்காட்டி விரல் குருவையும், நடுவிரல் சனியையும் குறிக்கின்றன. செவ்வாய் வீரம் மற்றும் தைரியத்தை வழங்குகிறது. குரு செல்வத்தை வழங்குகிறது. சனி தீர்மானிக்கும் ஆற்றலை வழங்குகிறது. ஆக, குபேர முத்திரை நம் வாழ்விற்கான அனைத்தையும் வழங்குகிறது.

நமது விருப்பத்தை உறூதியாக மனதில் நினைத்தபடி குபேர முத்திரை செய்துவந்தால் அது நிச்சயம் நடக்கும். மாணவர்களுக்குத் தேர்வில் வெற்றி, தொழில் செய்பவர்களுக்கு தொழிலில் வெற்றி என்றூ அனைத்துவித வெற்றியைத் தருவது குபேர முத்திரையாகும்.

குபேர முத்திரையிலிருந்து வெளிப்படும்  அதிர்வு அலைகள் வெளியிலிருந்து நமக்குத் தேவையான உதவியைப் பெற்றுத் தரும். மேலும் நமக்குள்ளேயும் வெற்றிக்கான ஆற்றலை உருவாக்கித் தரும்.

நேர்மறைச் சிந்தனையோடும், உறுதியான நம்பிக்கையோடும் இம்முத்திரையைச் செய்தால் நிச்சயம் பலனுண்டு. நமது குறிக்கோளை நிர்ணயித்துக் கொண்டு, நாம் அடைவது போல் காட்சிப் படுத்திக் கொண்டு, குபேர முத்திரையையும் பயிற்சி செய்துவந்தால் நாம் நிச்சயம் அடைவோம்.

இம்முத்திரை தலையின் முன்புறம் தேங்கியுள்ள சளியைக் கரைத்து வெளியேற்றும். 

காலம் 

இம்முத்திரையை எவ்வளவு நேரம் வேண்டுமானாலும் செய்யலாம். எங்கு வேண்டுமானாலும் செய்யலாம். உட்காரும்போது, நடக்கும்போது, நிற்கும்போது, தூங்கும்போது என எப்படி வேண்டுமானாலும் செய்யலாம்.

SSHARMA

வாழ்க வையகம்,   வாழ்க பாரதம்,   வாழ்க தமிழகம்

மலச்சிக்கலைப் போக்கும், மூல நோய் தீர்க்கும் ''அபான முத்திரை''.

 

''அபான முத்திரை''

செய்முறை

நிலத் தத்துவத்தைக் குறிக்கும் மோதிரவிரல் மற்றும் ஆகாயத் தத்துவத்துவத்தைக் குறிக்கும் நடுவிரல் நுனிகளை ஒன்றாகக் கொண்டுவந்து கட்டைவிரலின் நுனியை மென்மையாகத் தொடவும்.மற்ற இரு விரல்களை நேராகவும், தளர்வாகவும் வைக்கவும்.உள்ளங்கையை மேல்நோக்கி வைத்து அமர்ந்த நிலையில் இம்முத்திரையைச் செய்யவும். இது நில, ஆகாய, மற்றும் அக்னித் தத்துவங்களின் இணைப்பாகும்.

சிறப்புகள்

அபான முத்திரையில் நில, ஆகாய, மற்றும் அக்னித் தத்துவங்கள் இணைவதால் வயிற்றின் பாகங்களை நன்றாகச் செயல்பட வைத்து அவற்றின் திறம்பட்ட செயல்பாடுகளை உறுதி செய்கிறது.

ஜீரண மண்டலத்தின் முறையான செயல்பாட்டுக்கு இந்த முத்திரை மிகவும் முக்கியமானது. உடல், நோயின்றி இருக்க கழிவு நீக்க மண்டலம் சரிவரச் செயலாற்ற வேண்டும். அது போல கழிவு நீக்க மண்டலம் சரிவரச் செயலாற்ற, உடல் நோயின்றி இருக்க வேண்டும். அபான முத்திரை உடல் திறம்படச் செயலாற்றவும், தூய்மையாக வைத்துக்கொள்ளவும் உதவுகிறது.

யோகத்தில் உயர்ந்த நிலையை எட்ட, உடல் சிறந்த முறையில் செயலாற்றுவது அதிக முக்கியத்துவம் வாய்ந்ததாகும். ஒரு சாதகர் உடலின் ஒவ்வோர் உறுப்பின் தூய்மைக்கும் முக்கியத்துவம் அளிக்கவேண்டும். யோகாசனத்தில் விந்யாஸங்களைச் செய்த பின்னரும் ஹடயோகத்தின் போதும் அபான முத்திரையைச் செய்வதால் இந்த நிலையை அடையலாம். 

ப்ராண முத்திரையையும், அபான முத்திரையையும், மிகச் சரியான முறையில் செய்வதே ஒரு வகை யோகமாகும். இந்த இரு முத்திரைகளையும் ஒரு சமநிலையோடு செய்து வருவது ஒருவருக்கு ஆன்மீக நிலையில் உயர்ந்த இடத்தை அடைய உதவும். தொடர்ச்சியான பயிற்சியின் மூலம் இச் சமநிலையை அடைய முடியும்.

பலன்கள்

நமது உடலில் ஒவ்வொரு நிமிடமும் சிறுநீர், மலம், வியர்வை, போன்ற எண்ணற்றக் கழிவுகள் உற்பத்தியாகின்றன. அபானமுத்திரை, இக்கழிவுகளை நீக்கி  உடலைத் தூய்மையாக்குகிறது. உடலைத் தூய்மை செய்வதோடல்லாமல் இம்முத்திரை மனதையும் தூய்மையாக்குகிறது. அபான முத்திரையால் மலச்சிக்கல் பிரச்சினை தீரும்.

மலச்சிக்கல் மூல நோய்க்கு வழிவகுத்து இரத்தக் கசிவுக்கும், இறுதியாக அறுவை சிகிச்சை மூலம் அகற்றவேண்டிய பௌத்திரத்துக்கும் காரணமாகும். இந்தப் பிரச்சினை அபான முத்திரையைத் தொடர்ந்து செய்வதால் தீரும். அதிக வியர்வையும், வியர்வை வெளியேறாமல் இருப்பதும் நோயை உருவாக்கும். இது நல்ல அறிகுறி அல்ல. அபானமுத்திரை இக்குறைபாட்டைச் சரிசெய்யும். 

அபானமுத்திரை சிறுநீரகங்களின் செயல்பாட்டில் நேரடி விளைவை ஏற்படுத்தும். சிறுநீரை வெளியேற்ற முடியாத ஒருவர் இந்த முத்திரையைச் செய்தால் எளிதில் சிறுநீர் வெளியேறும். மருத்துவசிகிச்சை மற்றும் ஊசி மருந்துக்கு பின்னரும் கூட சிறுநீரை வெளியேற்ற முடியாதோர் 45 நிமிடம் அபான முத்திரை பயிற்சிக்குப்பின்னர் எளிதில் சிறுநீர் வெளியேற்றிய நிறைய உதாரணங்கள் உள்ளன.

ப்ராஸ்டேட் சுரப்பி தொடர்பான பிரச்சினை அல்லது சிறுநீர் தொடர்பான பிரச்சினை உடைய ஒருவர் அபான முத்திரையால் குணமடைவது மருத்துவ உலகையே ஆச்சரியப்படுத்தி உள்ளது. வயிற்றில் அதிக வாயு உடைய ஒருவர் அபான முத்திரையை 45 நிமிடங்கள் தொடர்ந்து செய்துவந்தால் எளிதாகப் பிரச்சினை தீரும். அபான முத்திரை பற்களின் நலனையும் பராமரிக்கும். பல்வலி குறையும். 

இம்முத்திரை சர்க்கரைநோயைக் கட்டுப்படுத்த உதவும். காலை நேரத்தில்40-45 நிமிடங்கள் அபானமுத்திரையைச் செய்தால் சர்க்கரை அளவு இயல்பு நிலைக்குத் திரும்புவது கண்டறியப்பட்டுள்ளது. அபான முத்திரையுடன் ப்ராண முத்திரையைச் செய்வது பலன்தரக் கூடியது. கர்ப்பிணிகளின் சுகப்பிரசவத்திற்கு இம்முத்திரை உதவுகிறது. 

அபான முத்திரையைத் தொடர்ந்து செய்வதால் வாய், மூக்கு, மற்றும் கண் நோய்கள் குணமாகும். 

வாழ்க வையகம்,   வாழ்க பாரதம்,   வாழ்க தமிழகம்    

தைராய்டு சுரப்பியைத் தூண்டும், உடல் எடை குறையும்.

 

சூர்ய முத்திரை

நிலத் தத்துவத்தைக் குறிக்கும் மோதிர விரலை மடக்கி அதன் நுனியை கட்டைவிரலின் அடிப்பாகத்தில் மெதுவாக வைத்து அக்னித் தத்துவத்தைக் குறிக்கும் கட்டை விரலால் மோதிரவிரலை மென்மையாக அழுத்தவும். மற்ற மூன்று விரல்களையும் நேராக வைத்து உள்ளங்கை மேல் நோக்கி இருக்கும் படி அமர்ந்த நிலையில் இம்முத்திரையைச் செய்யவும். 

சிறப்புகள்

நிலத்தத்துவத்தின் குறியீடான மோதிரவிரல் அக்னித் தத்துவத்தின் குறியீடான கட்டை விரலால் அழுத்தப்படும்போது தசைகளின் ஒழுங்கற்ற வளர்ச்சிக்குக் காரணமான நிலத்தத்துவத்தை சூர்யமுத்திரைக் கட்டுப்படுத்தி அதன் விளைவாக உடலிலுள்ள அதிகப்படியான கொழுப்பைக் கரைக்கிறது. மேலும், கட்டைவிரலின் நுனியும் அழுத்தப்படுவதால் பிட்யூட்டரி, பீனியல் சுரப்பிகளைக் கட்டுப்படுத்தும் நாடிகளும் அவற்றோடு தொடர்புடைய தைராய்டு மற்றும் பாராதைராய்டு சுரப்பிகளும் தூண்டப்படுகின்றன.

பத்மாசனம் அல்லது சுகாசனத்தில் அமர்ந்து உள்ளங்கையை மேல் நோக்கி இருக்குமாறு வைத்து சூர்யமுத்திரையைச் செய்யவும். இந்த முத்திரை தைராய்டு சுரப்பியைத் தூண்டி தேவையற்ற கொழுப்பைக் கரைக்க உதவும். காலை நேர நடைப்பயிற்சி, பிறரிடம் உரையாடுதல், தொலைக்காட்சி பார்த்தல், போன்ற நேரத்தில் சூர்ய முத்திரையைச் செய்யலாம். தினமும் காலை மற்றும் மாலை வேளைகளில் பத்மாசனம், வஜ்ராசனம், சுகாசனம், ஸ்வஸ்திகாசனம், போன்ற ஆசனங்களில் அமர்ந்து 5 முதல் 10 நிமிடங்கள் வரை இந்த முத்திரையைச் செய்தால் உடலிலுள்ள கொழுப்பைக் கரைக்க உதவும்.

பலன்கள்

சூர்யமுத்திரை ஆஸ்த்மா, சுவாசக்கோளாறுகள், சைனஸ், காசம், சளி, மற்றும் நிமோனியா ஆகிய நோய்களைக் குணப்படுத்தும். இம்முத்திரை ஜீரண ஆற்றலை அதிகரித்து நம்மை உற்சாகத்தால் நிறைக்கும்.

எச்சரிக்கை

கட்டை விரலின் அக்னித் தத்துவமும் மோதிரவிரலின் நிலத் தத்துவமும் ஒன்றிணையும்போது உடல் வெப்ப நிலை அதிகரிக்கும். அதனால் உடல் பலம் குன்றியவர்கள் ஓரிரு நிமிடங்கள் செய்துவிட்டு  வெப்ப நிலையில் ஏதேனும் மாற்றம் உள்ளதா என அறிந்த பின், தம்மால் இயலும், அல்லது பயனுள்ளதாக இருக்கிறது என்றால் மட்டுமே இம்முத்திரையைத் தொடரவேண்டும். சூர்யமுத்திரையோடு லிங்கமுத்திரையையும் சேர்த்து செய்தால் அதிகப் பலன்களைப் பெறலாம். இந்த இரு முத்திரைகளும் உடல் வெப்பத்தை அதிகரிப்பதால்  அதிக அளவு திரவ உணவை நாம் உட்கொள்ளவேண்டும். விரும்பிய பலனை அடைந்தவுடன் இந்த முத்திரையை நாம் தற்காலிகமாக நிறுத்திவிட வேண்டும். இந்த முத்திரை மன அழுத்தத்தைக் குறைக்கும். ஜோதிடத்தில் மோதிரவிரலின் அடிப்பகுதி சூரிய சக்தியைக் குறிப்பதால் அதிகப்படியான உடற்கொழுப்பு எரிக்கப்படுகிறது.  

  

வாழ்க வையகம்,   வாழ்க பாரதம்,   வாழ்க தமிழகம்